xoves, 5 de xuño de 2025

PDI 3ºC e 4ºC

 

Para desenvolver o proxecto “O folk na Lomba”, o alumnado de terceiro e cuarto do Anexo, xunto coas nosas titoras Isabel Castro e Mari Parada decidimos centrarnos nas festas tradicionais da nosa comunidade. En particular, nas chamadas festas cíclicas. Estas celebracións están ligadas ao ciclo da natureza e servían aos nosos antepasados para marcar o paso do tempo: o Samaín e Defuntos, o Magosto, o Nadal, o Entroido, os Maios...

Comezamos o noso proxecto cunha visita moi especial ao Museo do Pobo Galego, en Santiago de Compostela. Alí tivemos a oportunidade de descubrir, dunha maneira divertida e interesante, a riqueza da nosa tradición e cultura galega: o modo de vida, as crenzas, as costumes, as grandes festas marcadas polo calendario e outros aspectos da nosa sociedade tradicional.

Durante o percorrido, visitamos as salas dedicadas ao campo, aos oficios tradicionais, ao

traxe, á música e ao mar. ¡Cada unha tiña moito que contar e aprender.


Para non perdernos nada, cada un de nós levaba un itinerario que nos guiaba e nos propoñía pequenos retos: tiñamos que observar con atención e responder ás preguntas que se nos formulaban en cada sala. Ademais, seguiamos unhas frechas no chan que nos axudaban a avanzar polo museo sen desorientarnos.

Un dos momentos máis sorprendentes foi cando apareceu ante nós unha escaleira única no mundo, con tres rampas entrelazadas en forma de hélice. Cada rampa é independente e leva a distintos pisos do museo. ¡Unha marabilla! ¡¡Quedamos abraiados!!


E... isto non acabou aquí! O que máis nos gustou foi participar nun obradoiro con Raquel Queizás, que leva tempo investigando sobre as cantareiras e pandeireteiras maiores que aínda existen en Galicia. Aprendemos que “touporroutou” se lles chamaba a esas mulleres que lles gustaba moito ir de festa. Grazas a elas conservamos boa parte da nosa poesía oral. Mesmo escoitamos gravacións das súas voces, e Raquel contounos que... son unha gran inspiración para moitos músicos de hoxe en día. ¡Curioso! ¿Non si? 























Pasamos por diferentes espazos onde recreamos a labor de recompilación do patrimonio oral. Había un montón de obxectos para tocar: pratos, culleres, tixolas, cunchas, botellas...

Mentres uns tocabamos, outros bailabamos. ¡Armamos unha boa troula! ¡Foi xenial!







A visita ao museo foi unha experiencia moi enriquecedora. Volvemos coa mochila chea de información, recordos e anécdotas.
Xa na aula, repasamos o material recollido e compartimos as nosas vivencias. Continuamos afondando naqueles aspectos que máis nos chamaron a atención.
Agora tocábanos a nós recompilar refráns tradicionais galegos e poñer o noso gran de area na transmisión dese patrimonio oral. Para iso, botamos man dos nosos maiores (avós, pais, veciños...), dalgúns libros da biblioteca e tamén de diferentes páxinas web.
¡¡Quedábanos moito traballo por diante!!

Animámonos a facer dous tipos de refraneiros: un con refráns máis xerais, acompañados da interpretación do seu significado, e outro centrado nos refráns relacionados coas festas cíclicas. 
 






 






Ao mesmo tempo que traballabamos con estes refráns, tamén fomos aprendendo un montón sobre lendas, crenzas, ritos, costumes e labores do campo que teñen que ver coas estacións do ano.
¡Saíron cousas moi interesantes!
Fixemos murais sobre o Samaín, o Magosto, o Nadal e o Entroido, onde puxemos os
refráns que máis nos gustaron e explicamos as tradicións máis curiosas que atopamos.







 Na festa de Samaín, algúns aproveitamos para ir de Santa Compaña. ¡¡¡Que medo!!!
 



                                           ¡Preparándonos para o Entroido!
Antes de que chegara o Entroido, xa andabamos a investigar sobre os disfraces tradicionais galegos. Ao principio, pensabamos que atopariamos ben pouco pero cal foi a nosa sorpresa cando descubrimos unha chea de personaxes repartidos por toda Galicia, cada un cos seus propios traxes e costumes!
E.. como non podía ser doutra maneira, este ano tocábanos escoller un deses disfraces tradicionais. Adiviñade que se lles ocorreu ás nosas profes....
                                         ¡¡¡ Pois que nos disfrazaramos de MERDEIROS!!!

Si,si, como o escoitades. Cando o anunciaron, formouse unha boa algarabía... ¡Vaia rebumbio!
—“¿Pero isto que é?” —dicían algúns.
—“¡Están tolas!” —berraban outros.
—“Pois diso eu non vou” —rosmaban polo baixo máis dun.
Pero... como ben di o refrán: “No Entroido nada senta mal.”
O Merdeiro é un traxe tradicional da zona de Vigo que estivo prohibido durante moito tempo, e que agora se está a recuperar. Así que puxémonos mans á obra para pescudar: como ían vestidos, que facían e de onde viña esta tradición tan sorprendente.
Ao final, entusiasmounos a súa historia.
Cada un de nós pintou a súa carauta, e fixemos uns carteis para levar no pasarrúas.












Para o festival de Entroido, escollemos o tema “Ven bailar, Carmiña. Pasodoble do Berbés” da orquestra Sondeseu, co que artellamos unha coreografía ben xeitosiña entre todas e todos. ¡Pasámolo en grande!










Cando chegou o Día das Letras Galegas, xa sabiamos un pouquiño máis das nosas apreciadas cantareiras e pandeireteiras e da música tradicional galega.
E chegou o final, fomos  facer o obradoiro de baile galego, que ben o pasamos e canto aprendemos.
O profe contounos moitas cousas sobre as festas galegas, como naceron e quen as mantiveron e despois, a bailar.
Empezamos por pouquiño pero de aí a un chisco... xa estabamos cansos.
Foi moi divertido!


















Grazas a este traballo, demos un pasiño máis para manter vivas as nosas tradicións, sobre todo a tradición oral. Descubrimos que os refráns, as cancións, as lendas... son algo máis ca palabras: transmítennos emocións, lembranzas, coñecementos e axúdannos a entender formas de vida do pasado que aínda hoxe seguen tendo moito valor.

¡FOI MOI DIVERTIDO APRENDER XUNTOS!

mércores, 4 de xuño de 2025

PDI 3 anos Infantil Lomba

 

As nenas e nenos de 3 ANOS A estivemos a investigar un pouquiño na nosa tradición oral e
musical. Aprendemos que temos instrumentos que son propios de Galicia e que con eles fan
unha música moi bailona.
Algúns de nós vímolos e escoitámolos por primeira vez e aprendemos o seu nome: gaita,
pandeireta, tambor, cunchas…
Descubrimos o nome das persoas que tocan ditos instrumentos: gaiteira, pandereteira,
tamborileira… E experimentamos que noso corpo podemos producir ritmos e que na nosa gorxa
vibran unas cordas coas que podemos cantar. Encantounos a palabra CANTAREIRA.
Por certo, xa saberedes que tamén temos bailes propios, puxemos moito empeño en aprender a
bailar a muiñeira: ADIANTE, ATRÁS , 1-2-3.
 
Fixemos con moito agarimo esta pequena homenaxe a todas as cantareiras que fixeron posible
que estas coplas chegaran ata nós. A semente está botada e agardamos que medre e se
conserve para sempre.
AS CANTAREIRAS E BAILADORAS DO COLE DA LOMBA, CONVIDÁMOSVOS A DISFRUTAR DA MÚSICA E DO BAILE DA NOSA TERRA.
 



martes, 3 de xuño de 2025

Música e plástica nas aulas da Lomba, PDI Folk na Lomba

 

FOLK NA LOMBA na aula de música


Durante todo este curso escolar 2024-2025 na aula de música estivemos traballando a temática da PDI “Folk na Lomba”, centrándonos especialmente nas cantigas populares do noso folclore e a aprendizaxe dos instrumentos da nosa música popular.

Recuperamos xogos populares musicais como “ Serra, serra”, “Pedra pedriña” ou “Canción dos dedos”. Xogos de sempre que estaban esquecidos, e que agora volver a gozar os máis pequenos/as.


Desde 4º de Educación Infantil ata 6º de Educación Primaria fixemos un repaso dos retrousos das cantigas máis populares da nosa terra como son “A Rianxeira”, “Pousa, pousa” ou “A saia da Carolina”. Falamos do Cancioneiro Popular Galego, dos seus creadores, e por suposto das Cantareiras. homenaxeadas: Eva Castiñeira, Pandereteiras de Mens e Adofina e Rosa Casás.



 

 



 

 

 

 

 

 

 

 

 

 

 


Fixemos un percorrido ao longo de todo o curso das cantigas anuais seguindo as conmemoracións. Cantamos cantigas no Magosto no cole, saímos polas rúas de Vilagarcía no Nadal con cantos de Reis, preparamos unha canción no Entroido falando da nosa tradición que cantamos todo o cole no Parque da Xunqueira para as nosas familias e veciños e inventamos as coplas dos Maios 2025. Pero o máis interesante e sorprendente para o alumando foi viaxar aos tempos dos nosos avós e avoas e descubrir como desfrutaban da música naqueles tempos e revivir as festas tal é como o facían os nosos maiores.




Estas cantigas estiveron ben acompañadas de instrumentos da nosa música tradicional. Desde os máis pequenos/as ata os máis grandes exploraron a sonoridade de instrumentos como bombo, tamboril, castañolas, ferreñas, botella de anís ou cunchas . Pero o instrumento estrela deste curso, co motivo da celebración das Letras Galegas, foi a pandeireta. Aprendemos a tocar os ritmos de muiñeira e xota nos cursos altos e ata se crearon uns obradoiros de pandeiretas como moito éxito, e dos cales incluso saiu un grupo “A voz da Lomba” que levaron a súa interpretación a conmemoración das Letras Galegas organizado polo concello de Vilagarcía.

Para completar o noso percorrido polo noso folclore non podía faltar a danza. Bailamos soltos e agarrados, aprendemos os pasos principais da muiñeira e divertímonos en parellas bailando o pasodobre. E para os máis atrevidos un obradoiro de baile galego no que poder gozar coa nosa música.



FOLK NA LOMBA na aula de plástica


Na materia de plástica traballouse a arte en Galicia desde a seguintes liñas:

- Luis Davila. Traballamos o cómic seguindo o exemplo deste gran ilustrador.

 

- Maruja Mallo. Coñecemos a figura de Maruxa Mallo e o seu traballo a través da simetría.

 

- Poesía visual co poema de Rosalía “Un pelouro que roda”. 

 

- O debuxo de Castelao. Seguindo o refraneiro popular debuxamos segundo a técnica de Castelao.

 









- Cerámica de Sargadelos e Isaac Díaz Pardo. Creamos figuras con pasta de moldear despois de coñecer a cerámica galega.







luns, 2 de xuño de 2025

Mamasiña , que medo!!!!

 Parte do alumnado de 5º e 6º da Lomba preparou durante todo o curso a obra "Mamasiña, que medo" de    como obra de teatro. Encantoume o ben que o fixeron e nas tres sesións que fixeron, o público non chiaba, do atentos que estaban. Risas botamos, iso si. 





Todo o traballiño do ano, ensaiando nos recreos, memorizando, buscando vestiario,  música, pintando os decorados e por fin, estreando a obra. Ademais no medio está metida unha cantiga de cego, moi apropiada neste ano, onde a tradición oral é un dos piares do noso PDI.

Hai que lle dar a gracias ao profe Víctor, que foi o que estivo traballando con elas e eles e iso son moiiiitos recreos. 😍

PDI 3ºA e 3ºB

 Neste curso adicámonos a aprender moito sobre a música tradicional galega, nomeadamente na figura das pandeireteiras e a transmisión popular oral.

Na aula de música e nas actividades de plástica, que se recollen nunha entrada diferente, podemos ver moito do traballado neste curso: cantar cantigas e coplas, aprender baile galego ou coñecer distintos persoeiros da cultura plástica e artística de Galicia.Música e plástica

Aprendemos o papel das cantareiras e as vidas e valía destas mulleres que mantiveron a nosa cultura e música, que transmitiron moitos saberes e, como non, a retranca, símbolo do noso idioma.

Preguntamos na casa se sabían refráns sobre o tempo e que querían dicir. Ao haber moito alumnado estranxeiro, fixemos unha comparativa de refráns, cales querían dicir o mesmo, se serían traducións, como a xente acaba tendo en conta as mesmas cousas aínda que vivan en lugares do mundo tan separados uns doutros... Foi moi curioso o resultado. Vimos que o tempo, tanto meteorolóxico como cronolóxico, está moi relacionado coa relixión e cos santos, San Brais, Santa Lucía, A Candelaria... e os meses do ano.


 

No Entroido, todo o colexio participou cos diferentes disfraces tradicionais. Nós fomos do Enterro da Sardiña. É algo que se celebra por todo o alto moitas zonas de Galicia, dando lugar ao fin do Entroido, pero non en tódolos sitios vai igual. Aquí, en Carril, levan unha sardiña que se queima ao final do percorrido, no que se vai chorando, vestidos de loito, lembrando o boa que era a defuntiña. Cántanse coplas e nós coa base da música de "O Gato" inventamos tres coplas e retrouso falando do pouco que nos gusta vir ao colexio (si que nos gusta, pero nese momento é o mundo ao revés, he, he) e ao final, indultamos á Sardiña, tanto nos gustara facela e tanto cariño lle collemos, que volveu con nós para o colexio.

Tiñamos pensado que viñera "Pauliña" unha cantante galega moderna para lle facer unha entrevista ademais de escoitala cantar en directo, pero unha serie de circunstancias impediu que se achegar ao colexio. Quen si que estivo foi Xosé Ameneiro, carrilexo, ghaiteiro, músico e escritor.

Contounos un montou de cousas sobre os instrumentos tradicionais, mellor dito, ensinounos, porque o despregue de instrumentos que trouxo á biblioteca foi impresionante, e non só iso, é que tocaba todos e cada un deles. Ensinounos a facer un instrumento de percusión cunha casca de noz, un pauciño dun xeado e unha gomiña. Tamén que podemos aproveitar as cunchas das vieiras para tocar diferentes ritmos.Xunto coas cantareiras, moitas veces estaban cegos que cantaban e tocaban violíns ou mesmo zanfonas. A entrevista que se lle fixo demostrounos que sabe moito, que o sabe contar e o sabe tocar, e mesmo escribir, pois tamén é o escritor dun libro "Agustín Lorenzo Loroño; o gaiteiro de Catoira" con quen el tivo a sorte de tocar cando era aínda un rapaz e xa non tan novo.


 Non fixemos exactamente o que tiñamos pensado ao comezo, foron xurdindo outras cousas polo medio coma o obradoiro de baile galego coa mestra de música e con Marcela, unha das compoñentes da Banda da Loba, que temos a sorte de que está a traballar neste ano no noso colexio. Tamén aprendemos a tocar as cunchas e a pandeireta e moitas das horas dos recreos que chovía, a música empregada era tradicional, con coplas destas mulleres, e bailamos pola clase adiante.

Parte da clase participou en diferentes actividades representando a todo o colexio, nun vídeo explicando o que era o Enterro da Sardiña, noutro bailando cunha coreografía coa música  "Moiras" das Fillas de Cassandra. En fin, que este curso deu para moito e para moito máis que daría. O importante é que agora coñecemos e valoramos máis o tradicional, o saber popular e que sen mulleres bravas, o nosos patrimonio cultural e musical non sería tan completo.


sábado, 31 de maio de 2025

¡¡¡¡PARABENS 6º C!!!!

 ¡¡¡¡Que alegría teño no corpo!!!!

 

O alumnado de 6ºC que está participando no concurso de oratoria da Fundación Barrié , acadou o primeiro premio da súa categoría, despois de pasar clasificatorias, semifinais e por fin o ansiado 1º posto.  

Foron recibidos na Estación do tren como se merecen, a pesar do día tan longo, dos nervios e da viaxe, chegaron de volta cun sorriso que non lles cabía na cara. Ao berro de "¡¡Pública!!" os esperaban na estación. Por riba de moitos colexios privados, a escola pública está aí, arriba, como deber ser.

Ser capaces de levar un discurso, rebater, redicir, transmitir, ter compostura e sobre todo non ter medo a expresar o que se di, é algo que xa teñen aprendido, e que é importantísimo nesta vida, en todos os ámbitos. 

Como non podía ser doutro xeito, saíron na prensa, aquí deixo un pequeno dossier cos enlaces. 

Voz de Galicia  Quincemil Fundación Barrié

Bicos mollados.

Rosalía 

mércores, 28 de maio de 2025

Biblioteca creativa, obradoiro de BrazoLinda

 Olaa,

Tivemos a sorte de que nos viñeran visitar e mostrar o seu traballo as compoñentes de Brazolinda. O alumnado de 3º, 4º e 5º da Lomba tiveron un obradoiro onde lles ensinaron unha chea de xogos que deseñaron elas, algúns en madeira, outros con cartoné, en tea... pero TODOS en galego, polo que que mellor para este o noso ano de tradicións. a ecoloxía formou parte dalgún xogo, como coñecer a nos mitoloxía e as matemáticas, pero dun xeito moi ameno. 


O mellor de todo, as súas caras e despois de lles preguntar si lles gustara algún xogo e se querían que a biblioteca mercara algún😂 TODOS!!!! foi a súa resposta. Todos non podemos, pero xa temos unha chea deles encargados, esperemos que cheguen antes de rematar o curso para xa estrealos. Aquí vos deixo unha mostra, que as caras o din todo😊

Bicos mollados.

Rosalía 

luns, 26 de maio de 2025

Vilagarcía, cidade do libro.

 Case sen nos decatar, o curso está a piques de rematar e se achega un clásico xa. A cidade do libro na que se converte Vilagarcía e as actividades para a cativada que ofertan dende o Concello. Do noso colexio irán 2ºA e 2º B, 4ºA e 4ºB ao Literatour, unha grande xincana literaria. Polo de pronto, deixo o programa.








domingo, 25 de maio de 2025

PDI 5ºC e 6ºC

 

COCIÑAMOS NO COLE:

Despois dun traballo de investigación, realizado polos noso rapaces e rapazas, sobre diferentes receitas tradicionais galegas.

As clases de 5º e de 6º preparamos un postre tradicional galego. Os rapaces e rapazas trouxeron os ingredientes e os utensilios para poder preparar esta riquísima receita que finalmente quedounos fenomenal. Todos puidemos saborear do noso postre tradicional galego.


COÑECER AS CURIOSIDADES DE GALICIA:

En canto o obxectivo “Coñecer as curiosidades de Galicia” o alumnado sorprendeunos con diferentes curiosidades, buscadas no programa E-dixgal, tal como podemos observar nas seguintes fotografías.


RECEITAS TÍPICAS DE NADAL:

Aproveitando o Nadal, os rapaces e rapazas elaboraron nas súas casas diferentes receitas típicas galegas cunha exposición final das mesmas na Biblioteca do centro.


TORNEO DE ORATORIA:

O alumnado participou nun torneo escolar de oratoria (TEO) na Coruña quedando na clasificación da fase previa no segundo lugar con temáticas diversas como neste exemplo (o teatro galego).




FESTAS E ROMARÍAS (CANVA):

Tamén o alumnado realizou en Canva traballos diversos relacionados coas festas e romarías de Galicia.


DÍA DAS LETRAS GALEGAS:

Representamos no auditorio da localidade unha obra teatral e un baile ao ritmo de Luz Casal, o día das Letras Galegas (vídeo).


CONCURSO “ROSALÍA SEMPRE VIVA”:

No mes de febreiro, o alumnado foi a Lugo a participar no concurso “Rosalía sempre Viva” con recitado de poemas quedando clasificados nun primeiro e segundo posto.


ENTROIDO “CHOQUEIROS”:

No Entroido, os rapaces e rapazas investigaron, utilizando a plataforma de E-dixgal, a figura do Choqueiro (disfrace típico de Coruña). Cando xa sabían o que representaba o disfrace decidimos disfrazarnos e fixemos unha comparsa polas rúas de Vilagarcía, ademais dun vídeo explicativo para todo o alumnado do cole.


SAÍDAS DIDÁCTICAS:

O alumnado de 5º e 6º fixeron saídas didácticas (entre outras) ao Museo de Pontevedra, camiñada Castelao. Visita ao Grove en catamarán para degustar e visitar as distintas bateas e especies mariñas da zona. Realización dun tramo do camiño de Santiago onde observaremos a paisaxe e o entorno típico galego.


RADIO ESCOLAR:

Participación do alumnado de 5º e 6º na radio escolar cunha entrevista personalizada e en directo a unha coñecida galega DJ, chamada Kris e tamén se participou no concurso de Xosé Hermida de radio Pontevedra e radio Arosa con dous Podcast: o ikigai e o acoso escolar.

Grazas a isto o alumnado coñecerá en directo ao coñecido locutor de radio a nivel nacional Carles Francino cuxos descendentes foron galegos.


PERIÓDICO ESCOLAR:

O alumnado realizou diversos traballos a partir das noticias do periódico “A Voz de Galicia” xa que estivemos inmersos no programa de: “A Voz na Escola”.


sábado, 24 de maio de 2025

PDI 6ºA e 6ºB

 

MURAIS DA GAITA E DA PANDEIRETA

O obxectivo era coñecer os instrumentos musicais da tradición sonora galega así como coñecer a mulleres galegas músicas.

Investigamos sobre os instrumentos propios do folclore galego como son as pandeiretas, as gaitas, pandeiro, tarrañolas... Logo cada aula elixiu un instrumento e buscamos algo de información máis concreta sobre o mesmo: orixe, partes, materiais, mulleres galegas que destaquen no manexo dese instrumento. Por exemplo, no caso da gaita, traballaron sobre Susana Seivane e Cristina Pato.


RECOMPILACIÓN DE REFRÁNS

Mediante o uso dunha linguaxe codificada, fomos coñecendo semanalmente ditos e refráns en galego.

SERES MITOLÓXICOS

Identificar personaxes da mitoloxía galega e poñer en valor as lendas e historias da tradición oral galega.

Nas sesións de Proxecto Competencial o alumnado fixo un pequeno achegamento á mitoloxía galega. Primeiramente fixemos unha recompilación destes seres, vendo imaxes, lendo as súas historias e descricións... Logo, cada neno/a elixiu ao seu personaxe favorito para cubrir unha pequena ficha cos datos máis destacados (como é, habilidades/podes/capacidades, onde habita, orixe...).


LIBRIÑO COS TRAXES TÍPICOS DE ENTROIDO E CAROUTAS

A razón e a finalidade principais de afondar no Entroido galego é a de poñelo en valor, darllo a coñecer aos nenos e que aprendan a identificar algunhas das personaxes ou traxes máis relevantes.

Aproveitando que na festa celebrada no centro cada nivel educativo tiña que disfrazarse imitando unha destas personaxes, por sorteo fomos dándolle a cada neno e nena o nome dun destes traxes (peliqueiros, merdeiros, pantallas, xenerais, follateiros, boteiros...). Nunha ficha que incluía unha imaxe do mesmo, debían indicar como é o traxe en cuestión e que representa.

Ademais nas sesións de Educación Plástica fixemos varias caroutas e monicreques para decorar a aula.


PODCAST

Fixemos algunha gravación a modo de proba de radio. Na primeira entrevista tivemos como convidado ao líder da orquestra Panorama, Lito. Antes de rematar o curso agardamos poder entrevistar a Marcela, integrante do grupo A Banda da Loba.


mércores, 21 de maio de 2025

PDI 2ºA e 2ºB

 

Durante o primeiro e segundo trimestre os nenos e nenas de 2ºA e 2ºB recompilaron coa axuda das familias refráns da tradición oral galega. Logo ilústramos en clase e elaboramos un libro en cada aula, O refraneiro de 2ºA e O refraneiro de 2ºB. Tamén fixeron un audiolibro para cada aula, que se puxo a disposición da comunidade educativa a través da páxina web do centro. Por último fixemos presentacións dos Refraneiros ao resto de aulas do centro co gallo de que os nenos e nenas de tódolos cursos o desfrutasen e traballar así tamén a expresión oral.

En Nadal traballamos as panxoliñas, o canto de Reis e fixemos unha saída á contorna para pedir o aguinaldo. E no Entroido traballamos os traxes e bailes populares de Galicia e os nenos e nenas bailaron unha muiñeira e desfilaron vestidos de Madamas e Galáns de Cores.

Ao longo do segundo e terceiro trimestre os nenos e nenas de 2ªA e 2ªB investigaron sobre os mitos e lendas de Galicia. Cada neno ou nena investigou unha lenda ou un mito galego e posteriormente preparou unha presentación oral que gravou en vídeo. Estes vídeos están dispoñibles na aula virtual do centro para que todas as familias e os nenos e nenas poidan velos cando gusten.

Tamén os nenos e nenas de 2ºA e 2º B fixeron un pequeno proxecto para traballar os entroidos tradicionais galegos, aproveitando que tamén foi o tema do Entroido do cole de este ano.

No terceiro trimestre traballamos os contos de tradición oral galega, escoitando algúns deles, e facendo algunhas manualidades sobre os protagonistas.