Arte na Lomba

 Olaa, no edificio da Lomba ademais da Lagoa de Rosalía, agora temos dúas paredes azulexadas e pintadas para darlle máis ledicia ao entorno e sobre todo para que a xente saiba cal dos dous colexios que están ao carón, Lomba ou Arealonga, somos nós.

O ENDL estivo argallando e fixeron esta marabillosa proposta. Sobre un deseño pintado na parede, todo o alumnado foi pasando e contribuíndo en maior ou menor medida na súa realización. 

Gerardo Rodríguez Ramos é o artista que nos guiou nesta actividade e que organizou o beo. Os de 6º axudaron un montón, para algo son os maiores do colexio e ían guiando aos máis pequenos nesta fermosa creación conxunta.

Foron varios días de traballo, pero pagou a pena o tempo, temos unha fermosa entrada de infantil e xa non haberá dúbida de que somos "A Lomba".

Bicos mollados.

Rosalía

Vilagarcía, Cidade do Libro

 Ola,

Un ano máis contamos con actividades para todos os gustos e temáticas na semana que dende o concello se lle da valor ao libro na cidade.

Como contan con actividades para os centros escolares, por suposto que imos participar, de feito 4º A e 4ºB van ir ás xincanas o mércores 12. Xa nos contarán que tal o pasaron, ou se cadra, escapo eu tamén da miña Lagoa e vou botar unha ollada.

Polas tardes hai unha chea de actividades, déixovos o programa para que non vos perdades nadiña de nada.

Bicos mollados.

Rosalía

¡¡¡Parabéns Voluntarios desta Lagoa!!!

 

Olaaaaaa,

Hoxe empezo dando chimpos.

 A Dirección Xeral de Ordenación e Innovación Educativa da Consellería de Educación, Ciencia, Universidades e Formación Profesional, unha vez se lle mandan as memorias de todas as actividades que leva a cabo ao longo do curso o voluntariado de cada un dos centros, fai unha selección.

¡¡¡ O voluntariado da Lagoa acadou o recoñecemento de ser un  dos dez centros de primaria seleccionados de Galicia cuxas accións de Voluntariado merecen visibilización e así saíu publicado!!! 

Si é que non hai máis que mirar este blog para decatarse da cantidade de cousas que fan estes axudantes. Facelo está moi, pero que moi ben, sabelo non está de máis, pero que cho recoñezan deste xeito, ¡¡¡enche o peito!!!

Algo haberá que facer para dalgún xeito agradecerlle todo o traballiño que fan e o recoñecemento público. Polo de agora non podo dicir nada máis, pero xa estou a argallar algo😉

Bicos molladísmos e ledísimos.

Rosalía

Os Castros da Lomba xa están feitos

 O alumnado de infantil da Lomba, ademais de aprender un montón de cousas sobre a ría, aprendeu tamén sobre os Castros. De feito en Vilagarcía temos os restos dun:  "Castro Alobre" e ata aló foron visitalo.

E non sabedes que, ¡¡apareceu un home castrexo para lles falar de como vivía!! ¿A que non o esperabades?

Aprenderon como vivían, como se construían as súas casas e de feito, da man de Mar Barral, unha ceramista da vila, crearon os seus poboados, as súas vivendas e mesmo xoias.

Dende as casa tamén axudaron moito nestas investigacións, e trouxeron unha manchea de produtos e contos.

Sería longo de contar e chegados a estas alturas do curso e coa calor que vai, xa non teño forzas para escribir. Unhas imaxes valen máis ca mil palabras.

Bicos mollados.

Rosalía

Coa música sempre

 No edificio da Lomba, para contextualizar este PDI, tamén traballaron os instrumentos tradicionais desta zona, que moitas veces son de zonas máis grandes, ou feitos cos materiais que están na nosa contorna. Voluntarios de varios cursos decidiron facer os seus unha vez explicado como era o proceso, e non quedou nada mal!!!

Ademais, está o canto... E, achegándonos como nos achegamos á semana da música e das artes escénicas, non está mal lembrar que tamén están a aprender cancións coma "A saia da Carolina", "Catro vellos mariñeiros", "A Rianxeira", "Na beira do mar", "Son do Ar", "Himno Galego", "Foliada de Carril", "Amoriños collín"...

 

Xa publicaremos unha escolma do alumnado cantando. De feito xa nas memorias dalgúns grupos, as cancións aparecen mentres van de excursión ♩♩♩♩♩♩♩

PDI 3ºC e 4ºC

Os alumnos/as de terceiro e cuarto do Anexo recibimos con moita ilusión o tema do PDI deste curso, “Son Ría”.

 

O primeiro que quixemos saber foi que era unha ría e onde estaba situada a nosa Ría de Arousa.

Para elo, non se nos ocurriu nada mellor que sobrevoar, grazas a Google Earth, toda a costa galega. Vimos que hai moitíiiisimas rías. Cando chegamos as Rías Baixas, atopamos a Ría de Arousa e descubrimos que... É A RÍA MÁIS GRANDE DE GALICIA!.

Unha viaxe espectacular!

 

Emprendemos a mesma “viaxe” utilizando varios mapas. Decidimos elaborar dous, un de Galicia con todas as rías e, outro da Ría de Arousa no que destacamos os principais portos pesqueiros, illas....

Quedáronnos así:

 

Buscamos información sobre os principais traballos da nosa ría relacionados co mar, especialmente o marisqueo, a pesca e as bateas, así coma das distintas artes e aparellos que utilizan.

Tamén quixemos coñecer as especies de peixe e marisco que viven na Ría de Arousa. Non sabiamos que había tanta variedade!

Enterámonos de que As Rías Baixas son un dos ecosistemas máis produtivos do mundo. Son especialmente ricas en bivalvos, sobre todo en diferentes tipos de ameixas, berberechos, vieiras, volandeiras...

 

Chegou o Entroido e nos disfrazamos de pescadores/as, mariñeiros/as e peixeiros/as. Cada un de nós ideou e amañou na súa casa o seu propio disfrace así coma unha grande “variedade de peixes e mariscos”. 

 

Tamén preparamos uns carteis para levar ao desfile.

Xa no colexio, xurdiu a idea de poñer un posto de peixe e marisco co “produto” que tiñamos, coma os da praza de abastos. Fixemos publicidade e atraemos moitos clientes. Quitábannolos das mans!

Ademais da algarabía que se formou, a venda foi todo un éxito. ¡Que ben o pasamos!

 

E, unha cousa leva a outra. Tivemos que facer as contas e algunhas indagacións para calcular as ganancias, xa que nos decatamos de que había que descontar os gastos e unha porcentaxe para contribuír a Facenda. Porcentaxe? Que será iso?

 

¡¡Ata se achegaron as biólogas a medir a talla dos peixes!!

Outro tema que nos interesou investigar foi o tema das mareas: que son, como se orixinan, a influencia da Lúa, mareas mortas, mareas vivas, preamar, baixamar... Iniciámonos na interpretación dunha táboa de mareas, ferramenta fundamental para a xente que traballa no mar.

 

Fomos mariscadores/as por un día. Visitamos os parques de cultivo de Carril para realizar o obradoiro “Marisqueo a pé”. Uns días antes consultamos a táboa de mareas para ese día.

Unha mariscadora explicounos un pouco de historia, algunhas tradicións, a importancia deste oficio para a zona, as dificultades que teñen...

Aprendemos a distinguir algúns tipos de ameixas e de algas, a manexar a gancha e o angazo, as labores de cultivo e extracción de ameixas, limpeza dos viveiros...

E agora xa sabemos o duro que é este traballo que nunha gran maioría é de mulleres.

Unha experiencia única!

 

Rematamos o nosos traballo cunha visita á Praza de Abastos, onde puidemos ver en vivo algúns peixes e mariscos da nosa costa xunto con outros produtos da nosa horta. 

 

 

                                                 

Aconteceu que canta máis información tiñamos, máis queriamos saber. Pero aquí xa rematamos. Este proxecto serviunos para achegarnos ao medio próximo, coñecer a riqueza natural da nosa ría, valorar a súa importancia e coidado e concienciarnos sobre os problemas que causan a contaminación.