sábado, 22 de novembro de 2025

Día da Música

 Ola 🎵🎶🎻🎼🎺🎹🎸🎷

Hoxe é Santa Cecilia, patroa da Música. Parte do alumnado de Infantil do edificio da Lomba estivo a traballar coas placas Makey makey e comprobaron como con froita e vexetais tamén se pode facer música.

Coas súas partituras, leron e tocaron unha sinxela canción, pero que soa moi ben. Decidiron agasallar dalgún xeito á profe Sandra para que desfrutara do seu día, musicalmente falando, e pediron que se vise este vídeo.

¿A que da xenio ver  estes artistas? 

Que a música nos acompañe hoxe e tódolos días da nosa vida.

Bicos mollados.

Rosalía🎶🎵 

venres, 21 de novembro de 2025

Rachando co guión

Ola,

 Hoxe actuou no noso centro A Xanela do maxín para o alumnado de 4º dos dous edificios. A dicir verdade, non so foron os da Xanela, 10 alumnos e alumnas tamén formaron parte do espectáculo. É unha obra ofertada para medrar en igualdade.




Nesta obra, os monicreques tiñan pequenos diálogos, que protagonizaban distintos personaxes de dúas familias. A raíz destes diálogos, abríase a quenda de preguntas, sobre o que nos parecía o que dixeran, se estabamos de acordo, se non, por que... E a verdade é que fixo que pensaramos e nos decatáramos dunha serie de patróns de conduta, que as veces están aí, no subconsciente e que pouco a pouco hai que cambiar. E falo por min, que non son máis que unha ra, porque a maioría do alumnado xa ten as cousas moi claras. 

Deíxovos as actuacións tan marabillosas que tivemos.

 





Bicos mollados.

Rosalía 


xoves, 6 de novembro de 2025

Recreos superactivos

 Olaaaa,

Nos recreos estamos a ter a biblioteca chea de alumnado. É certo que non poder baixar ao patio tamén axuda, pero aínda así, hai xogos que lles encantan.

¡¡¡ Mirade se hai ou non hai creatividade nesta biblioteca !!!

 










Bicos mollados.

Rosalía 

luns, 27 de outubro de 2025

Bibliopatio

 Olaa,

O noso voluntariado, fiel coma sempre (que non chova), baixou ao patio para que quen queira aproveitar as raiolas de sol e un libro, poida facelo. Aí os temos co carriño e os seus petos tomando nota de quen leva o libro, para que non se traspapele ningún..

 


Bicos mollados.

Rosalía 

xoves, 23 de outubro de 2025

O club de lectura a pleno rendemento

 Olaaaa,

Os grupos van funcionando que da xenio. O único problema é que non sempre nos lembramos de facer fotos. No Anexo temos dous grupos que leva a profe Patricia: un con "Invisible" de Eloy Moreno e outro con "Cuando brillan las estrellas" de Victoria Jamieson, Omar Mohamed

Na Lomba xa se reuniron os do grupo da outra profe Patricia e están a ler "Anna Kadabra: O club da lúa chea" de Mañas Romero Pedro, onde ademais comeron unhas galletas riquísimas que lles achegou a profe, e outros tres grupos que leva a profe Mariel "Idol" de  Alba Chan, Ene, que estiveron no noso centro o curso pasado,  "Eu tamén fun pequena" de  Concha Blanco e "Dona problemas" de  O Hematocrítico.

Quedan aínda grupos por comezar, é que non damos abasto, pero tranquilidade todo o mundo, que habemos de ler. Déixovos unhas fotiños dos días que si que nos lembramos de facelas.

  



Bicos mollados.

Rosalía

martes, 14 de outubro de 2025

Traballiño coas pezas do Kapla

 Ola,

Recreo tras recreo o tempo da para bastante, senón que llo digan a estas rapazas que montaron esta preciosa estrutura coas pezas do Kapla. Isto é ter paciencia e constancia, ademais de sorte de que non viñera alguén despistado e querendo coller un libro, lles desmontara o beo.

Bicos mollados.

Rosalía 

venres, 3 de outubro de 2025

Búscanse debulladores e debulladoras no Anexo

 Olaa,

A profe Patri preparou unha presentación para ver canta xente de 5º e 6º quere unirse ao noso club.

Non me diredes que non queda ben clariño o que hai que facer e sobre todo o que é. Animádevos.










 Bicos mollados.

Rosalía 

xoves, 2 de outubro de 2025

Arrancan as primeiras debulladoras

 Olaa,

Empezamos o noso "Debullando contos" cun grupo de 4º e a lectura "Eu tamén fun pequena" de Concha Blanco. 

Estas rapazas tiñan un montón de dúbidas sobre como funcionan os clubs de lectura, se tiñan que estar lendo o libro no recreo mentres tiñamos a reunión, se o podían levar a casa, que que pasaba cando o les e non che gusta... unha vez resoltas as súas inquedanzas, e despois de imaxinar que sería o que aprenderían lendo o conto, quedaron moi contentas e fachendosas co seu exemplar. 

Xa nos dirán na próxima reunión se lles gustou ou non.

 

Bicos mollados.

Rosalía 

xoves, 25 de setembro de 2025

¡¡Voluntariado Activado!!

 Boas,

Xa temos ao noso voluntariado disposto a botar unha man ou as dúas na biblioteca. Tivemos onte a nosa primeira reunión no recreo para decidir en que cousas preferían colaborar, porque non todo o mundo gusta de facer o mesmo, hai quen axuda a arrombar os libros, hai quen quere ler os contos á cativada pequena ou ir ao centro de día, baixar os libros ao recreo co Bibliopatio, a organizar as mochilas viaxeiras e hai quen ten tanta enerxía acumulada no corpo, que se apunta a todo, si, lestes ben a TODO. E tamén houbo quen estaba enfermo/a e xa viñeron hoxe para dicir onde preferían colaborar.

Fixemos unha foto pero aínda andamos pendentes de permisos de imaxes, así que en canto estea todo listo, publicarase.

Mentres tanto, ¡¡¡Viva o VOL-A!!!

Bicos mollados

Rosalía 

martes, 16 de setembro de 2025

Chamando ao voluntariado e aos debulladores

 Olaaa,

Temos xa o prazo aberto para que o alumnado de 5º e 6º da Lomba se apunte para entrar no voluntariado da nosa Lagoa. Estou segura de que moitos dos que xa estiveron o curso pasado repetirán e que teñamos novas incorporacións.

O club de lectura Debullando Contos ten así mesmo o prazo aberto e nas aulas de 4º, 5º e 6º da Lomba e nas de 5º e 6º do Anexo. Podedes apuntarvos para poder crear os grupos e comezar canto antes. De seguro que haberá moitos repetidores no club, e iso, é cousa boa.

Déixovos a foto da axenda deste curso que leva na portada o nome do PDI deste curso: "Érase unha vez na Lomba"


 Bicos mollados 

Rosalía 

martes, 9 de setembro de 2025

¡¡¡Voltamos ao colexio!!!

 Olaaaaaa

Que contenta estou de vervos de novo polo centro e como non, polas bibliotecas 😀💕

 

Este ano traballaremos o paso do tempo, ás diferentes culturas conforme avanza a historia da humanidade e o título do noso PDI é: "Érase unha vez na Lomba"

Estamos seguros de que aprenderemos un montón de cousas e que cando remate o curso, nas memorias dos diferentes ciclos e niveis quedará unha boa mostra de todo o traballado.

Estade atentos e atentas, que dentro de moi pouco pasarán Mariel e Patricia polas aulas de 4º en diante para que vos anotedes no club de lectura "Debullando Contos"

E na Lomba tamén pasarán para 5º e 6º por se queredes ser voluntarios desta Lagoa e botar unha man e dinamizar e promover a lectura.

Unha aperta ENORME, como presta estar con vós de novo.

Bicos mollados.

Rosalía 

venres, 20 de xuño de 2025

Fin de festa

 Rematamos o curso con xogos e cunha verbena popular, nunha xornada e convivencia dos dous edificios dentro do recinto da Lomba.

No cartaz de anuncio, como se fan nas festas todo ao longo de Galicia, puxemos as actividades a realizar e as actuacións previstas. Non podía faltar a comida, e xunto cos churros preparados pola Churrería Compostela Racing, houbo tamén unha Foodtruck Dfesta, o que ven sendo unha furgoneta onde se prepara comida para a venda. Neste caso o alumnado non tivo que pagar nada, puideron  tomar un canciño quente, e ata houbo quen tivo sorte e repetiu, mira que correron cando se avisou de que podían repetir!!!


Comezamos cos xogos, continuamos con Yanet Carranza, que cantou de marabilla e fixo que moveramos moito o esqueleto, facendo trens, rodas e como non, unha muiñeira.

Continuamos coa Charanga Xuntanza e os do Anexo marcharon acompañados por ela mentres na Lomba, Dj Alex amenizaba o fin de festa.

Marchamos para casa cunha chapa de recordo para poder lucir no verán e presumir de colexio.

Se premedes aquí, poderedes ver un pequeno vídeo resumo do que foi a xornada. 

Todo o bo remata.

Collede forzas nas vacacións e lembrade que ler tamén é viaxar, para os que non teñades a sorte de movermos e Vilagarcía.

Bicos mollados.

Rosalía 

Chegaron as vacacións

 Olaa,

Este é sempre un día no que se mesturan un montón de emocións, alegría porque chegan as vacacións, tristura porque imos deixar de ver á xente que queremos por un tempo, ou por moito tempo. No caso do alumnado de 6º estamos contentas pola nova etapa que comezan, pero á vez tristeiras porque parte deles son os nosos voluntarios e voluntarias e /ou integrantes dos clubs de lectura. É que son moitas horas as que pasan nesta biblioteca e claro, xa somos da familia.

Como todos os anos, levaron as recomendacións lectoras, pero queremos deixalas aquí por si se traspapelan  ou simplemente por se hai xente que quere saber que recomendamos dende esta lagoa.

Lembrade que aínda que nas vacacións esta biblioteca pecha, as bibliotecas municipais non, e a posibilidade de ler libros por internet está tamén aí.

Agárdovos o curso que ven.



 Bicos mollados.

Rosalía 

xoves, 19 de xuño de 2025

Entrega de diplomas de Voluntariado e dos Clubs de lectura

 Mi madriña!!! Non dabamos feito, esta biblioteca ten moita sorte, está moi, pero que moi viva.

¿A que non acertades co número do alumnado Voluntario? Seguro que non, 31 axudantes da nosa Lagoa, dise pronto. Haber hai máis, pero que axudaron moito menos e non chegaron aos requisitos mínimos que se pide neste programa. Non por iso son menos importantes, pero non levan o recoñecemento pleno.

¿E o número dos integrantes dos clubs de lectura? Aí si que non ides acertar nin de broma... ¡¡89!! si, lestes ben, oitenta e nove. Estamos contando so ás persoas, porque moita desta xentiña, está  no de narrativa, pero tamén no de manga / banda deseñada. Para que digan que a infancia non le, se cadra noutros centros non, pero aquí dende logo que SI.

 Vou poñer unhas fotiños dos días das entregas, non está todo o mundo, xa se sabe, con estes cambios de temperatura houbo bastantes gripes e non saen na foto, pero levar levaron os seus diplomas e pequenos agasallos cos que dende a biblioteca queremos devolver dalgún xeito o cariño que nos dan eles e elas participando nas nosas actividades. Ademais como coincidía cunha nova representación da obra de teatro "Mamasiña, que medo" os actores e actrices tiveron que marchar escopetados unha vez lles din o diploma, é o que ten ser artistas!!

 









Un pracer  ter contado con tanto alumnado implicado.

Bicos mollados.

Rosalía 

 

luns, 16 de xuño de 2025

Poesía e pandeireteiras en Infantil da Lomba

 Olaa,

Parte do alumnado de infantil traballou a reo, aprenderon poemas  e debuxaron a unhas pandeireteiras fabulosas que eran eles e elas mesmos que maxicamente cobraron vida, non volo perdades😉


Bicos mollados.

Rosalía 

mércores, 11 de xuño de 2025

Vilagarcía, somos cidade do libro

 Ola,

Parte do alumnado do centro, entre eles os de 2º da Lomba, foi participar nas actividades que dentro deste evento realiza e oferta o Concello. Houbo unha xincana literaria na que aprenderon moitas cousas e xogaron a reo. Si é que todo o que teña que ver cos libros é marabilloso.

 












Bicos mollados.

Rosalía