Olaa,
O noso voluntariado, fiel coma sempre (que non chova), baixou ao patio para que quen queira aproveitar as raiolas de sol e un libro, poida facelo. Aí os temos co carriño e os seus petos tomando nota de quen leva o libro, para que non se traspapele ningún..
Bicos mollados.
Rosalía
Olaaaa,
Os grupos van funcionando que da xenio. O único problema é que non sempre nos lembramos de facer fotos. No Anexo temos dous grupos que leva a profe Patricia: un con "Invisible" de Eloy Moreno e outro con "Cuando brillan las estrellas" de Victoria Jamieson, Omar Mohamed
Na Lomba xa se reuniron os do grupo da outra profe Patricia e están a ler "Anna Kadabra: O club da lúa chea" de Mañas Romero Pedro, onde ademais comeron unhas galletas riquísimas que lles achegou a profe, e outros tres grupos que leva a profe Mariel "Idol" de Alba Chan, Ene, que estiveron no noso centro o curso pasado, "Eu tamén fun pequena" de Concha Blanco e "Dona problemas" de O Hematocrítico.
Quedan aínda grupos por comezar, é que non damos abasto, pero tranquilidade todo o mundo, que habemos de ler. Déixovos unhas fotiños dos días que si que nos lembramos de facelas.
.jpeg)
Bicos mollados.
Rosalía
Ola,
Recreo tras recreo o tempo da para bastante, senón que llo digan a estas rapazas que montaron esta preciosa estrutura coas pezas do Kapla. Isto é ter paciencia e constancia, ademais de sorte de que non viñera alguén despistado e querendo coller un libro, lles desmontara o beo.
.jpeg)
Olaa,
A profe Patri preparou unha presentación para ver canta xente de 5º e 6º quere unirse ao noso club.
Non me diredes que non queda ben clariño o que hai que facer e sobre todo o que é. Animádevos.
Rosalía
Olaa,
Empezamos o noso "Debullando contos" cun grupo de 4º e a lectura "Eu tamén fun pequena" de Concha Blanco.
Estas rapazas tiñan un montón de dúbidas sobre como funcionan os clubs de lectura, se tiñan que estar lendo o libro no recreo mentres tiñamos a reunión, se o podían levar a casa, que que pasaba cando o les e non che gusta... unha vez resoltas as súas inquedanzas, e despois de imaxinar que sería o que aprenderían lendo o conto, quedaron moi contentas e fachendosas co seu exemplar.
Xa nos dirán na próxima reunión se lles gustou ou non.
Bicos mollados.
Rosalía
Boas,
Xa temos ao noso voluntariado disposto a botar unha man ou as dúas na biblioteca. Tivemos onte a nosa primeira reunión no recreo para decidir en que cousas preferían colaborar, porque non todo o mundo gusta de facer o mesmo, hai quen axuda a arrombar os libros, hai quen quere ler os contos á cativada pequena ou ir ao centro de día, baixar os libros ao recreo co Bibliopatio, a organizar as mochilas viaxeiras e hai quen ten tanta enerxía acumulada no corpo, que se apunta a todo, si, lestes ben a TODO. E tamén houbo quen estaba enfermo/a e xa viñeron hoxe para dicir onde preferían colaborar.
Fixemos unha foto pero aínda andamos pendentes de permisos de imaxes, así que en canto estea todo listo, publicarase.
Mentres tanto, ¡¡¡Viva o VOL-A!!!
Bicos mollados
Rosalía
Olaaa,
Temos xa o prazo aberto para que o alumnado de 5º e 6º da Lomba se apunte para entrar no voluntariado da nosa Lagoa. Estou segura de que moitos dos que xa estiveron o curso pasado repetirán e que teñamos novas incorporacións.
O club de lectura Debullando Contos ten así mesmo o prazo aberto e nas aulas de 4º, 5º e 6º da Lomba e nas de 5º e 6º do Anexo. Podedes apuntarvos para poder crear os grupos e comezar canto antes. De seguro que haberá moitos repetidores no club, e iso, é cousa boa.
Déixovos a foto da axenda deste curso que leva na portada o nome do PDI deste curso: "Érase unha vez na Lomba"
Rosalía
Olaaaaaa
Que contenta estou de vervos de novo polo centro e como non, polas bibliotecas 😀💕
Este ano traballaremos o paso do tempo, ás diferentes culturas conforme avanza a historia da humanidade e o título do noso PDI é: "Érase unha vez na Lomba"
Estamos seguros de que aprenderemos un montón de cousas e que cando remate o curso, nas memorias dos diferentes ciclos e niveis quedará unha boa mostra de todo o traballado.
Estade atentos e atentas, que dentro de moi pouco pasarán Mariel e Patricia polas aulas de 4º en diante para que vos anotedes no club de lectura "Debullando Contos"
E na Lomba tamén pasarán para 5º e 6º por se queredes ser voluntarios desta Lagoa e botar unha man e dinamizar e promover a lectura.
Unha aperta ENORME, como presta estar con vós de novo.
Bicos mollados.
Rosalía
Rematamos o curso con xogos e cunha verbena popular, nunha xornada e convivencia dos dous edificios dentro do recinto da Lomba.
No cartaz de anuncio, como se fan nas festas todo ao longo de Galicia, puxemos as actividades a realizar e as actuacións previstas. Non podía faltar a comida, e xunto cos churros preparados pola Churrería Compostela Racing, houbo tamén unha Foodtruck Dfesta, o que ven sendo unha furgoneta onde se prepara comida para a venda. Neste caso o alumnado non tivo que pagar nada, puideron tomar un canciño quente, e ata houbo quen tivo sorte e repetiu, mira que correron cando se avisou de que podían repetir!!!
Comezamos cos xogos, continuamos con Yanet Carranza, que cantou de marabilla e fixo que moveramos moito o esqueleto, facendo trens, rodas e como non, unha muiñeira.
Continuamos coa Charanga Xuntanza e os do Anexo marcharon acompañados por ela mentres na Lomba, Dj Alex amenizaba o fin de festa.
Marchamos para casa cunha chapa de recordo para poder lucir no verán e presumir de colexio.
Se premedes aquí, poderedes ver un pequeno vídeo resumo do que foi a xornada.
Todo o bo remata.
Collede forzas nas vacacións e lembrade que ler tamén é viaxar, para os que non teñades a sorte de movermos e Vilagarcía.
Bicos mollados.
Rosalía
Olaa,
Este é sempre un día no que se mesturan un montón de emocións, alegría porque chegan as vacacións, tristura porque imos deixar de ver á xente que queremos por un tempo, ou por moito tempo. No caso do alumnado de 6º estamos contentas pola nova etapa que comezan, pero á vez tristeiras porque parte deles son os nosos voluntarios e voluntarias e /ou integrantes dos clubs de lectura. É que son moitas horas as que pasan nesta biblioteca e claro, xa somos da familia.
Como todos os anos, levaron as recomendacións lectoras, pero queremos deixalas aquí por si se traspapelan ou simplemente por se hai xente que quere saber que recomendamos dende esta lagoa.
Lembrade que aínda que nas vacacións esta biblioteca pecha, as bibliotecas municipais non, e a posibilidade de ler libros por internet está tamén aí.
Agárdovos o curso que ven.
Rosalía
Mi madriña!!! Non dabamos feito, esta biblioteca ten moita sorte, está moi, pero que moi viva.
¿A que non acertades co número do alumnado Voluntario? Seguro que non, 31 axudantes da nosa Lagoa, dise pronto. Haber hai máis, pero que axudaron moito menos e non chegaron aos requisitos mínimos que se pide neste programa. Non por iso son menos importantes, pero non levan o recoñecemento pleno.
¿E o número dos integrantes dos clubs de lectura? Aí si que non ides acertar nin de broma... ¡¡89!! si, lestes ben, oitenta e nove. Estamos contando so ás persoas, porque moita desta xentiña, está no de narrativa, pero tamén no de manga / banda deseñada. Para que digan que a infancia non le, se cadra noutros centros non, pero aquí dende logo que SI.
Vou poñer unhas fotiños dos días das entregas, non está todo o mundo, xa se sabe, con estes cambios de temperatura houbo bastantes gripes e non saen na foto, pero levar levaron os seus diplomas e pequenos agasallos cos que dende a biblioteca queremos devolver dalgún xeito o cariño que nos dan eles e elas participando nas nosas actividades. Ademais como coincidía cunha nova representación da obra de teatro "Mamasiña, que medo" os actores e actrices tiveron que marchar escopetados unha vez lles din o diploma, é o que ten ser artistas!!
.jpeg)
.jpeg)
.jpeg)
.jpeg)
.jpeg)
Un pracer ter contado con tanto alumnado implicado.
Bicos mollados.
Rosalía
Olaa,
Parte do alumnado de infantil traballou a reo, aprenderon poemas e debuxaron a unhas pandeireteiras fabulosas que eran eles e elas mesmos que maxicamente cobraron vida, non volo perdades😉
Bicos mollados.
Rosalía
Ola,
Parte do alumnado do centro, entre eles os de 2º da Lomba, foi participar nas actividades que dentro deste evento realiza e oferta o Concello. Houbo unha xincana literaria na que aprenderon moitas cousas e xogaron a reo. Si é que todo o que teña que ver cos libros é marabilloso.
Rosalía
Olaa,
O alumnado de infantil na Lomba aprende un montón de cousas e as súas mestras póñenllo doado, porque aínda que da traballiño facer todo isto, despois da moito máis gusto velo e repasar o aprendido. Non é bo estar coas pantallas todo o tempo, pero un chisquitiño si.
Genially (premer)
Bicos mollados.
Rosalía
As alumnas e os alumnos de 4º A e B da Lomba realizamos este curso moitas actividades arredor das nosas tradicións. Comezamos cunha iniciativa que nos encantou xa que, antes das vacacións de Nadal, saímos polas rúas da nosa vila a cantar panxoliñas e así recuperar o tradicional Canto aos Reises. Conseguimos un bo aguinaldo: mexillóns, luras, cabazas, pan,etc. Con todo o bote, os cociñeiros e cociñeiras da Lomba, prepararon un delicioso aperitivo que desfrutamos todos xuntos no comedor. Esperamos que esta iniciativa se converta nunha tradición de Nadal e poder repetir o próximo ano!
.jpeg)
.jpeg)
No Entroido, fixemos unha viaxe polas diferentes localidades de Galicia achegándonos ós seus festexos. Nós eliximos o Entroido de Pontevedra e, na clase, elaboramos un disfrace do loro Ravachol. Centos e centos de plumas encheron as nosas aulas!
.jpeg)
Durante todo o curso moitas e moitos de nós participamos no obradoiro de pandeireta organizado pola mestra Marcela.
Pasámolo xenial e aprendemos moitas cousas.Mesmo algúns decidiron continuar coa aprendizaxe fóra da escola e mercaron a súa primeira pandeireta. Pero non só temos principiantes nisto da pandeireta, tamén temos moitas expertas e expertos que participaron no Festival Escolar do Día das Letras Galegas no Auditorio de Vilagarcía. Ademais, aproveitando o Día das Letras Galegas, na clase analizamos a vida de pandeireteiras importantes. Realizamos unha pandeireta bibliográfica e un minilibro coa información máis importante.
Non podemos esquecer do ben que o pasamos no I CantaArousa. Que emocionante foi compartir ese día con mestres, familias e compañeiros doutras escolas !
Vémonos o ano que ven !
As alumnas e alumnos de 4.º da Lomba.
