Que rápido pasou o tempo! Xa fixeron a segunda e última xornada de formación con LEGO da man de NENOOS, e o xoves que ven tocaralles a 4ºc e 5ºC no anexo e 5ºB na Lomba.
Seguro que continuarán facendo cousiñas na biblioteca, que para iso está aberta toda a mañá e dúas horas polas tardes.
E que nesta sesión fixeron un rescate, helicópteros... que ben o pasaron, non hai máis que lles mirar ás caras. Déixovos fotiños e video.
Así comeza unha das cancións máis coñecidas dos maios, un poema de Curros Enriquez e musicado por Luis Emilio Batallán canción
No pabillón montamos o noso maio e posteriormente tocamos unhas coplas para facer o día redondo. Son costumes que non hai que perder e que dende ENDL se fomentan, pois forman parte da nosa cultura.
Hoxe foi a quenda do alumnado de 4ºC e 5ºC no Anexo e de 5ºB na Lomba. De novo Cris explicou o funcionamento e os obxectivos desta actividade e todo o mundo aprendeu un montón.
Os nosos voluntarios outro día máis (xa sabedes, luns e xoves), baixaron o noso carriño ao patio para que así quen queira poida estar ao aire libre e ler durante o tempo de recreo.
Xa sabemos que hai quen trae o libro da casa, ou mesmo que vai pola biblioteca antes de baixar ao patio, pero para a xente que se despista, temos esta modalidade.
Hoxe estamos a celebrar o Día do libro, e vós diredes, ¿pero non se celebrou xa o 2 de abril? Pois non, ese é o do libro infantil.
Hoxe é o Día Mundial do Libro e dos dereitos de autor. Celébrase dende 1995 cando foi fixado pola UNESCO (Organización das Nacións Unidas pola Cultura, as Ciencias e a Educación).
Xusto preto desta data, o 23 de abril, Faleceron tres grandes da literatura mundial: Miguel de Cervantes (o creador do Quixote), Garcilaso de la Vega e Willian Shakespeare .
Dende a lagoa quixemos darlle visibilidade a Cervantes e por iso puxemos libros do Quixote expostos. Ademais nas aulas houbo propostas de lecturas no plan lector, había que ir mirando polas portas o que se ofertaba e apuntando o nome no que interesara.
O lema que ocupou este día foi "Bibliorría, pesca un libro e alégrate o día" facendo referencia ao noso PDI "Son Ría" e vaia si se pescaron libros, non tedes máis que mirar as fotos.
Tamén aproveitamos esta data para darlle unha segunda vida aos libros de espurgo, ofertando que os adoptaran e os levaran para casiña se estaban interesados.
En fin, que foi moi interesante e que gozamos e que lemos... Deixovos unha mostra para que o comprobedes.
Non me puiden resistir, en canto preparamos todo para a actividade, xa pedín que me fixeran unha foto para que se vexa que eu tamén estou sendo activa e creativa.
No día de hoxe tiveron a sorte de facer esta actividade os de 4ºA, 4ºB e 5ºA. por quendas baixaron á biblioteca e Cris, a monitora, foilles explicando como traballar con este programa e coas pezas, pero non só había que montar, había que programar e confirmar que o que eles querían facer, eran quen de programalo ben e que a súa máquina realizaba o esperado.
O traballo foi en equipo, e xa se sabe as veces xorden pequenos conflitos e frustración por non ser capaz de facer á primeira o que se pretendía... así é a vida e dos erros é de onde mellor se aprenden as cousas.
Eles quedaron encantados, esperando que lles toque xa a seguinte sesión para poder traballar máis e aprender. O 25 de abril serán os de 4º e 5º do anexo e os de 5ºB os que traballen co Lego.
Aquí queda un pequeno vídeo como mostra do traballado.
Mañá empezamos coas sesións para 4º e 5º de LEGO WEDO. Están dentro da nosa biblioteca creativa e grazas a asesoría podemos desenvolver estas actividades de formación. Será unha primeira toma de contacto e despois... a imaxinación ao poder!!
Xa estamos de volta das vacacións de Semana Santa.
Hoxe ademais do día do Autismo , celébrase tamén o Día do Libro infantil, data de nacemento de Hans Christian Andersen.
A sección patrocinadora deste ano é Xapón que difunde a mensaxe de Eiko Kadono e o cartel de Nana Furiya co lema "Navega polos mares coas alas da túa imaxinación".
GÁLIX, Asociación do Libro Infantil e Xuvenil, facilítanos a tradución ao galego de Mercedes Pacheco.
Temos no expositor unha escolma de libros de poesía que están á vosa disposición para poder facer lecturas no plan lector ou cando vos cadre mellor, porque un día coma este hai que celebralo.
De feito, en 4ºA xa se puxeron as pilas e aquí temos o resultado.
Lembrade quen son eu, Rosalía, a ra que le poesía😉
Hoxe tivemos a sorte de contar coa presenza de David Rodríguez e o seu espectáculo "Superavoa" El é o escritor, ilustrador e contacontos deste fermoso libro.
Todo infantil estivo ben atento ao que lles contou e cantou, porque remataron cantando unha canción coa guitarra. Non perderon comba e pasaronno xenial.
¡Que gusto ter este tipo de actividades no colexio! De seguro que en canto sexan quen de ler por eles mesmos, este vai ser un dos primeiros que collan na biblioteca.
Hoxe ademais de celebrar o 8 de marzo, día da Muller, enterámosnos do pasamento de Akira Toriyama aos 68 anos.
O noso club de lectura, Debullando Contos está de loito, pois a sección manga que leva o profe Fernando ten moitas das series que escribiu, Dr. Slump, Dragon Ball... e que se levaron á pantalla converténdoas en anime.
Arale fixo que moitas nenas se decataran de que ser nenas tamén podía significar ser protagonistas, ser fortes, ser un pouco tolas e poderosas, sen complexos de ningún tipo. Así que unha parte deste 8M tamén vai adicado a Akira, pola súa visión do mundo, pois a única que venceu a Goku foi ela!!!
Temos o noso expositor preparado para dar visibilidade a este día. Dende o equipo de igualdade teñen preparadas unha chea de actividades e nós aportamos o noso gran de area para non ser menos, que as lecturas e os contos fan que aprendamos e sobre todo que non esquezamos.
Olaaa!!! Chegou o día e a cativada da Escola Infantil Municipal achegouse á nosa biblioteca!!! Tivemos unha manchea de rapazas e rapaces na lagoa, mira se é certo que eran tantos, que houbo que facer dúas quendas para poder estar dentro.
Viñeron ben agarradiños á corda para non se despistar e xa abaixo, na entrada ao colexio, o voluntariado da biblioteca estaba esperando para poder recibilos como se merecen e para axudalos a subir ata o primeiro piso, que é onde están os nosos libros.
Presenteime, e os voluntarios e voluntarias tamén, para a continuación empezar coa lectura escenificada dos contos. Eu non perdín comba, estiven moi atenta.
Os primeiros comezaron con "Ola, Arco da Vella" e despois foi a quenda de "Os planetas" Ao rematar a actuación apareceron cos andeis móbiles onde están os libros máis adecuados para a súa idade e escolleron os que máis lles gustaban para poder velos, tocalos e lelos, algúns xa soliños e soliñas, outros coa axuda do noso voluntariado.
Pasamos un ratiño moi agradable, tanto que cando nos decatamos, xa tiñan que marchar, que chegaba a quenda seguinte. Axudámolos a baixar e a amarrar de novo a corda para non se despistar polo camiño que aínda que estamos ao lado, mellor é ir seguros.
¡¡Máis rapazada chegando ao colexio!! Segunda quenda subindo á Lagoa.
Desta volta, despois de me presentar, os libros lidos polo voluntariado foron "La manita" e "Chim, bam, bum" Este último vai de facer música e ao rematar ofrecéronlles facer música aos que quixeran, que non foron poucos, aínda que había quen era máis vergoñento ca outro. E tiveron unha sorpresa os artistas, Sara estaba de aniversario así que lle cantamos todos xuntos e xuntas para darlle os nosos mellores desexos.
Obviamente tras a música, ¡os contos!, que non poden faltar nunha biblioteca, elixiron, cambiaron, intercambiaron, leron, léronllos... e de novo o reloxo facendo que visita rematara para o noso pesar. Axudamos a baixar as escaleiras, pediron que outro día fósemos nós a visitalos a eles e xa estamos a pensar cando poderemos facelo.
De recordo da súa visita, as mestras levaron un marcapáxinas para cada un, e supoñemos que hoxe xa estará nas súas casiñas, para que se lembren de nós e se queren, esta poida ser a súa lagoa, cando veñan ao colexio dos maiores. deixamos este vídeo para que poidades ver un pouquiño desta visita que tanto nos gustou.